Sobre as Eleccións do 1 de marzo

Como durante ese tempo tiven o Blog inactivo e agora reinicio pasadas as Eleccións, non quero dar a impresión de que non falo disto por mor dos resultados. Xa está dito case todo, pero cando menos a xeito de posicionamento persoal quixera dicir algunhas cousas:

• A xestión do Goberno bipartito foi ampla e positiva para Galicia. Iniciáronse proxectos estratéxicos como o Saneamento das Rías, o Plan Ferrol, o Plan de Infraestruturas, ou Leis como a de Igualdade no Traballo, a de Servizos Sociais etc.
• O Presidente Touriño foi un gran Presidente, comprometido có país, traballador arreo día tras día, que soubo ser esixente e corresponsabel có Goberno Estatal, cunha xestión especialmente positiva para Ferrolterra, con iniciativas tan importantes como o`propio Plan Ferrol, o saneamento do marxe sur da Ría, a Autovía Ferrol-Vilalba ou a VAC Ferrol-San Cibrao, o financiamento da Praza de España etc.
• Son moitas as cousas boas que se fixeron, pero é certo que en algo fallamos, seguramente na explicación das políticas ós cidadáns. Quizais pensamos que só con facer as cousas ben a xente nos seguiría, e non é así. Hai que facer, explicar porque se fai e compartir os proxectos cós cidadáns.
• En relación á unidade do Goberno, penso que a xente entende que cada partido teña o seu propio perfil, pero non tolera que un proxecto minoritario se aplique a toda a sociedade. Penso que o afán protagonista do BNG, especialmente de Quintana, Fernando Blanco e Aimerich, foi en aumento ó longo da lexislatura ata o punto de chegar niveis irritantes.
• Do lado socialista cometeuse o mesmo erro á inversa, non se soubo plantar cara a determinados feitos e antepúxose a unidade do Goberno ós intereses xerais dos cidadáns. Por exemplo permitindo campañas como a de INdependencia ou o nome de Galescolas ou a bandeira no mandilón dos nenos, ou a frase de Fernando Blanco sobre a súa prevalencia sobre o Presidente no concurso eólico.
• En definitiva, mentres o PSOE se obsesionaba pola "xestión" o BNG exaltaba a escenografía transmitindo unha imaxe conxunta desequilibrada en relación ó peso de cada un e á percepción cidadá da xestión.Agora a dereita quere gañar dúas veces, si, unha no 1 de marzo e outra colocando a responsabilidade da derrota non en erros concretos senón no feito mesmo do pacto.
• No futuro temos que en primeiro lugar defender as políticas do Goberno socialista ante o PP, recompoñer os vínculos cós cidadáns e presentar un modelo claro e diferenciado da dereita un modelo Socialdemócrata no económico, galeguista na identidade e radical nos dereitos cidadáns.
• Eu defendo para o futuro o entendemento con outras forzas, e en Galicia, tal como está o mapa político o PSOE e o BNG terán que entenderse na Xunta e nos Concellos, sexa para compartir goberno ou só apoio parlamentar. Terá que ser un entendemento sereno e non competitivo, xa que aínda que é certo que compartimos un segmento de electorado, tamén é certo que xente nosa nunca votará BNG e viceversa. Por isto debemos, chegado o caso, pactar as políticas, as formas e incluso os desacordos, para que cada partido poida responder claramente ante o seu electorado.
• De outras polémicas como o da lingua hai moito que falar, simpremente dicir que nos fomos inxenuos e o PP falsario e irresponsábel. Ó meu entender as políticas lingüísticas hai que facelas pero non presumir delas, simpremente aplicalas con naturalidade.

Podería seguir ata non sei cando pero de momento queda aquí.