Curiosa percepción mediática das medidas de Zapatero

Onte o Presidente do Goberno presentou no Consejo Económico y Social o informe anual sobre a situación económica. En primeiro lugar hai que dicir que faino por auto compromiso, xa que non está previsto en ningún procedemento ou precepto lexislativo, faino porque estima necesario que o Goberno, ademais de render contas diante do Congreso e do Senado, tamén o faga diante dos representantes dos sindicatos e empresarios, axentes principais da economía real.

Pois ben, a prensa destacou basicamente dous asuntos, un que "por fin Zapatero asume a existencia da crise", e outro a conxelación dos salarios dos Altos Cargos da Administración Central.

Tiven ocasión de ver con máis detalle as 21 medidas entre as que se atopaban estas dúas, e puiden comprobar que son certamente as menos importantes, as que menos transcendencia terán para os cidadáns e as que menos carácter reformista e racionalizador representan. Quero nesta entrada destacar algunhas que me parecen certamente importantes e que penso deberían ter un maior espazo nos medios de comunicación pola incidencia directa que terán na vida dos cidadáns.

• Destinaranse 35.000M€ en 2009 e 2010 para liñas de apoio á financiación de PEMES, despois de que xa neste ano se aumentara esta contía de 3.500 a 8.000M€.
• 2.500M€ para a un Plan Renove para rehabilitación de vivendas, para reincorporar ó mercado inmobiliario vivendas valeiras, e de instalacións hoteleiras para apoiar a expansión dos sectores turístico e da construción.
• Unha nova regulación para simplificar a tramitación das rehabilitacións de edificios.
• 1.500M€ para un Plan VIVE para renovar vehículos de máis de 15 anos e introducir outros con menos emisións de CO2.
• Reforma da Formación Profesional para que recoñeza a experiencia laboral.
• Liberalización e potenciación do transporte de mercadorías, dos Aeroportos e dos Portos.
• Melloras no sector das telecomunicacións, como a protección dos dereitos dos usuarios e a ampliación de servicios dispoñibles en Banda Ancha.
• Lei para a reforma do sector servicios para reducir trabas administrativas.
• Redución do 20% dos aranceis de Notarios e Rexistradores.

Estas son outras medidas, meramente enunciadas, que o Presidente explicou no día de onte. A pregunta é ¿porque estas non teñen intres para a maioría dos medios de comunicación?